Siunnersorneqarfiusinnaasut allat
Nuna tamakkerlugu inunnut innarluutilinnut saaffiginnittarfik Pissassarfik.
Pissassarfimmi siunnersorneqarsinnaavutit atortunik ikiuutinik pikkorissarnernillu. Pissassarfik uunga saaffigineqarsinnaavoq telefon + 299 34 50 70 allaffiginiaraannilu uunga allattoqarsinnaavoq pissassarfik@nanoq.gl
ISI – Kalaallit Nunaanni tappiitsunut isigiarsuttunullu peqatigiiffik
ISI tappiitsunut isigiarsuttunut ilaqutaasunullu Kalaallit Nunaanni peqatigiiffiuvoq. Peqatigiiffik arlalippassuarnik ilungersuussaqartarpoq sulissutigalugulu tappiitsut isigiarsuttullu pitsaanerusunik atugassaqartitaanissaat.
ISI nuna tamakkerlugu ilaasortaqarpoq. ISI uunga attavigisinnaavat telefon 299 59 91 95 allaffigaluguluunniit uunga isi@isi.gl
Inuit innarluutillit allaffeqarfiat TILIOQ
Tilioq-mi maalaarnissannut siunnersorneqarsinnaavutit, assersuutigalugu kommuunimut qinnuteqarninni itigartitaasimaguit. Tilioq uunga saaffigineqarsinnaavoq +299 24 22 44 allaffigaluguluunniit uunga info@tilioq.gl
Inatsisitigut ikiorsiisarfik IKIU
IKIU-mi akeqanngitsumik kinaaninnillu nalunaaruteqarnak ikiorneqarsinnaavutit. IKIU-mi piumassutsiminnik siunnersuisartut inatsisilerituutut ilinniarsimasuupput. Ilaanni IKIU Kalaallit Nunaanni angalasarpoq. IKIU uunga saaffigineqarsinnaavoq + 299 32 45 48 allaffigaluguluunniit ikiu@ikiu.gl
Maalaarfiusinnaasut eqqartuussiviillu
Qinnuteqaatinnut imaluunniit atortunik ikiuutaasinnaasunik qinnuteqaatinnut itigartinneqaruit aalajangiinermut tunngasumik maalaarsinnaavutit. Kommune qinnuteqaatinnut itigartitsilluni aalajangiiguni tamatigut siunnersuuteqassaaq qanoq iliorlutit maalaaruteqarsinnaanersutit. Kommunep sianerfigiinnarlutit oqarfigiinnarsinnaanngilaatit “naamik sapaatip akunneranut nalunaaqquttap akunnerinik 20-nik tapersersorteqarnissannut akissaqanngilagut”. Aalajangiinerup allaganngorlugu pinissaanut pisinnaatitaavutit.
Aalajangiineq inatsimmik tunngaveqassaaq. Imatut paasisariaqarpoq inatsimmi malittarisassaqassaaq illit nammineq qupperlugu imarisaata takusinnaanissaanut. Aalajangiinerup uppernarsassavaa kukkuneqanngitsuuneranik illillu innuttaasutut aalajangiinerup imarisaata paasilluarnissaanut.
Aalajangiinermi isumaqatigineqaraluaruilluunniit aalajangiineq allaganngorlugu piumasarisinnaavat. Imaassinnaammat ilumoornerit allanut uppernarsaatitut takutikkusukkit.
- Maalaarsinnaanissamut malittarisassat kapitali 7-mi takusinnaavatit
- Aalajangiinerit allaganngorlugit malittarisassat immikkooortoq 23-mi takusinnaavatit
Isumaginninnermi Naammagittaalliuuteqartarfik
Siusinnerusukkut oqaatigineqareersutut qinnuteqaatinnut itigartitaaguit suna pissutigalugu kommunep itigartinneraatit patsisigisaa paasisariaqarpat. Aamma kommunep qanoq iliornissannik siunnersortussaavaatit.
Kommunep itigartitsinerminut tunniussaa naammagittaalliornissannut siunnersuumik ilaqassaaq.Taassuma imarissavai inatsisit maleruagassallu sorliit atorneqarsimanersut. Naammagittaalliornissami aamma paasissutigineqassaaq piffissap qanoq sivisutiginissaanut periarfissaqarnersoq.
Naammagittaalliornissamut piffissarititaasut sivisussusii assigiinngissinnaapput apeqqutaalluni
inatsimmi suna pineqarnersoq. Isumaginninnermi tunngassuteqartuni amerlanertigut sapaatit akunnerinik arfinilinnik sivisussuseqartarpoq.
Naammagittaalliornermi siunnersuummi nalunaarutigineqasssaaq naammagittaalliutit sumut nassiunneqassanersoq. Amerlanertigut Isumaginninnermi Naammagittaalliuuteqartarfimmut nassiunneqartassaaq.
Naammagittaalliorniaruit skema tamatumunnga tunngasoq immersussavat. NemID-qaruit qarasaasiaq atorlugu sullissivik.gl-mut nassiutissavat. Aamma allagaqarsinnaavutit emailikkulluunniit nassiussisinnaavutit. Sianernissannuttaaq periarfissaqarputit.
- Atuisartoqarnermut Unammilleqatigiinnermullu Aqutsisoqarfik (aua.gl)
- Isumaginninnermi Naammagittaalliuteqartarfimmut naammagittaalliuteqarit (sullissivik.gl)
Ombudsmandi
Misigisimaguit kommuunip inatsit malissimanngikkaa imaluunniit suliaq ilinnut tunngassuteqartoq sivisuallaamik suliarisimagaa ombudsmandimut maalaaruteqarsinnaavutit. Ombudsmandip inatsisit ingerlatsinermut tunngasut pillugit siunnersuutigisinnaavai.
Ombudsmandimut maalaaruteqartinnak Isumaginninnermut Naammagittaalliuuteqartarfimmut naammagittaalliuuteqaqqaassaatit.
Ombudsmandi uani saaffigineqarsinnaavoq + 299 32 78 10 ugguunalu post@ombudsmand.gl
Eqqartuussiviit
Kingullerpaatut suliassiissutigisaq pillugu eqqartuussivilersuunneqarsinnaavoq.
Pitsaanerpaajuvorli akikinnerpaajullunilu Isumaginninnermut Naammagittaalliuuteqartarfimmut naammagittaaliuteqaraanni, kommunep eqqartuusivimmut tunniutinnginnerani.