1. Siuleq naggasiullu
Aallaqqaasiut
Tappiitsunut isigiarsuttunullu tikikkuminassutsit pillugit ilitsersuut inunnut tamakkuninnga sulialinnut aamma Dansk Blindesamfundimi inunnut sinniisunut eqqarsaataavoq.
Taamaalilluni ilutsit, iluseq, imarisai ujaasinissamullu periarfissat eqqarsaatigalugit iluarsaassamik nutaamillu peqartoqalerpoq. Misilittagarilerneqarsimasut tunngavigalugit inatsisit, teknikkikkut piumasaqaatit, assigiissutsit, malittarisassat il.il. saqqummersitami matumani nutarterneqarsimapput.
1998-imi Dansk Blindesamfundimit ”Tilgængelighed i Detaljen”, saqqummersinneqarpoq, atuagaq tikikkuminassutsinut tunngasoq inunnut isiginiarnermikkut innarluutilinnut qitiutinneqartoq. Atuagaq 2004-mi nutarterneqarpoq quppersakkatullu tallimatut saqqummersinneqarluni, tassami atuisartut atuakkamik aamma pissarserusussinnaassammata imaluunniit atuakkap immiussat ilaanik pissarserusussinnaammata.
Tikikkuminassutsit nunami piunngilaq imaluunniit Dansk Blindesamfundip kisimi pingaarnersiugarinngilaa. Killeqarfiit qarsullugit, minnerunngitsumik Nunani Avannarlerni, suliassaqarfimmi misilittagarpassuarnik paarlaasseqatigiittoqartarpoq. Norges Blindesamfundimik ilisimasat pillugit ikorfartuinerit paarlaasseqatigiinnerillu iluaqutisimasorujussuuavut aammalu tassanngaanniit oqaaseqatigiinnik assinillu atuinissatsinnut akuersisoqarnera qujassutigalutigu.
Atuisartunik misissuineq
Iluarsaassilluni sulinermi aaqqissuisoqatigiit siornatigut saqqummersinneqarsimasut q qanoq sunniuteqarsimanerat, siammarsimanerat aamma sunniuteqarujussuarsinnaanerat misissussallugu naleqqutsissimavaat. Illussanik titartaasartunik, siunnersortinik sulisullu sinniisaannik arlalinnik atuisartunik misissuinerup takutippaa ikittuinnaat ”Tilgængelighed i Detaljen”-imik ilisimasaqartut. Tassunga ilanngullugit ikittuinnaat tikikkuminassutsit, piumasaqaatit malittarisassallu pillugit malittarisassanik ullumikkut ininut avatangiiserisanut aaqqissuunneqarnerannullu tunngaviusunik akunnattumik taamaallaat ilisimasaqarput.
Tamatuma saniatigut apersorneqartunit akissutit takutippaat oqaaseq ”tikikkuminassuseq” inunnit amerlanernit timikkut innarluuteqarnermut, assersuutigalugu inuit assakaasulinnik qamutersortut, ajaappiallit assigisaannillu atortorissaarutillit, assersuuttaraat. Taamaattumik siunnersortit oqaatsimik ”tikikkuminassutsimik” naammattoorsigaangamik suna eqqarsaatigisarneraat aperineqaraangamik usingiartarfiit, kaajallattarfiit matserfiillu silissusii eqqarsaatigisarpaat.
Aperineqartunit akissutit aallaavigalugit aaqqissuisoqatigiit inunnut isiginiarnermikkut innarluutilinnut tunngatillugu tamanna siunnersortinit eqqarsaatigineqarsimanngitsoq aaqqissuisooqatigiinnit inerniliissutigineqarpoq.
Tappiitsunut isigiarsuttunullu tikikkuminassutsit /pissarsiariuminassutsit puigorneqarput
Tamatumunnga pissutaasinnaasut ilaat tassaavoq inuit isiginiarnermikkut innarluutillit tassaapput inuit pissutsit assigiinngitsorpassuit pissutigalugit isigiarsuttut. Tamatuma malitsigisai taamaalillutillu iliuuseqarnissamut pisariaqartinneqavissortut nikerartuusinnaapput assigiinngiiaartuusinnaallutillu. Pisariaqartitat inuup tappiitsup, isigiarsuttorujussuup, isiginiarnera annikillerujussuarsimasup imaluunniit isigiarsulilaarsimasup toqqissisimanissaanut aamma tikikkuminassutsit eqqarsaatigalugit atuisinnaanissaanut naammassineqartussat assigiinngissuteqartorujussuusinnaapput.
Tikikkuminassutsit pilersaarusiornerup ilaattut
Sanaartortitsisup siunnersortinut entreprenørinullu suliakkiisartup sanaartukkani immikkoortut ilaattut tikikkuminassutsit pingaarutilerujussuusut paasisimasariaqarpaa. Tamanna pilersaarusiornermi siusissukkut ilanngunneqartariaqarpoq. Allatut oqaatigalugu tikikkuminassutsit ima ilanngunneqassapput allaat malittarisassat malitsigisaannik eqqarsaatiginninnerit, misilittakkat atuisartullu pisariaqartitaat allatulli nalinginnaasutut ilanngunneqartartutut, soorlu ikuallattoornissamut isumannaallisaanerit, aningaasaqarneq nukiussiuutinillu eqqarsaatiginninnertulli, isumassarsinermiit ilanngunneqartassallutik. Tikikkuminassutsit tamatut inissinneqarunik tamakku pilersaarusiornermi suliarinninnermilu eqqarsaatiginninnernut assigiinngitsunut, ilusaat pillugit aporaaffiunngitsut, ilanngukkuminarnerussapput, taamaalillutilni suliaq eqaatsumik ilusilersuinermut tunngasoq pineqalissaaq.
Pissutsit ullumikkutut itsillugit tikikkuminassutsit pingaarnersiukkatut allattukkani appasippallaamiipput, pineqartoq arlaannit eqqumaffigineqarsimassappat. Eqaatsumik ilusilersuinermut tunngaviit malitsigisaannik sanaartukkat inaarsarnerini tamani siunissaq ungasinnerusoq eqqarsaatigalugu ilanngussuunneqartut akuliunneqarluarnerussapput atorluarneqartuassallutillu.
Naggasiut
Taaguutaa: Tilgængelighed for blinde og svagsynede. TIBS
Saqqummersitsisoq: Dansk Blindesamfund
Blekinge Boulevard 2,
2630 Taastrup
E-mail: info@blind.dk
Web: www.blind.dk
Assiliisoq: Rie Ollendorff Architects, alla allassimanngippat.
Titartaasoq: Rie Ollendorff Architects, alla allassimanngippat.
Aaqqissuisoqatigiit:
John Heilbrunn, Dansk Blindesamfund
Torben Olesen, Dansk Blindesamfund
Jørgen Bak, Dansk Blindesamfund
Rie Ollendorff, Rie Ollendorff Architects ApS
TIBS ukunannga ilanngutassiariffigineqartarlunilu suliarineqarpoq:
Thomas Rosenberg, adjungeret professor overlæge, Kennedycentrets Øjenklinik
Asger Bay Christiansen, Laboratoriet Lys og Syn
Hans Rasmussen, it-konsulent, Dansk Blindesamfund
Norges Blindeforbund m.fl.
Ukioq saqqummersitsiffiusoq: 2014