Inatsisit, malittarisassat ilitsersuutillu
Atortulersuutit sanaartukkallu tikikkuminartut pillugit inatsisit atuuttut
FN-imi inuit innarluutillit pisinnaatitaaffii pillugit isumaqatigiissut 2006-imi decembarip ulluisa pingajuanni FN-imi akuerineqarpoq. Isumaqatigiissut inuit pisinnaatitaaffii pillugit isumaqatigiissutaavoq inuit innarluutillit tunngaviusumik pisinnaatitaafffiinik qulakkeerinnittussaq. Tamanna pillugu annertunerusumik Institut for Menneskerettigheder-imi paasisaqarsinnaavutit: http://www.menneskeret.dk/handicap
Taamaalilluni inuit pisinnaatitaaffii pillugit isumaqatigiissutit ilaneqarput, maannakkullu kikkunnut tamanut tunngalerput. Arnaannaanngitsut, meeraannaanngitsut, inuiaqatigiit danskiunngitsut ikinnerussuteqartuinnaanngitsut – aammali inuit innarluutillit.
Danmarkimi FN-imi innarluutillit pillugit isumaqatigiissut isumaqataaffigineqarpoq taamaalillunilu isumaqatigiissut atortussanngortissallugu pisussaaffeqalerpoq, tassa imaappoq inatsimmi allanngortitsilluni aamma inatsisit suliniutillu nutaat innarluutillit pisinnaatitaaffiinik pitsanngorsaataasut immikkoortitsisoqannginnissaalu akueralugit.
Sanaartornermut illuliornernullu inatsisini Nalunaarutinilu tikikkuminassutsit pillugit piumasaqaateqarnerit, tassunga ilanngullugit aamma nutaanik sanaartukkanut, allanngortiterinernut aamma illoqarfimmi qanittumi nunaminertat aneerfissat pillugit arlalippasuarnik siunnersuisoqartarpoq. SBi-mi misissugassanik allattuisoqarsimavoq tassaniippullu tikikkuminassutsit pillugit piumasaqaatit aamma illuliornermut malittarisassanut attuumassuteqartunik siunnersuinerit. Una takuuk: http://www.sbi.dk/tilgaengelighed/tjeklister
Vejdirektoratetimi (Aqquserngi pillugit aqutsisoqarfik) aqqusinerni angallaffiusuni tikikkuminassutsit pillugit aqqusinerni malittarisassiorsimapput: ’Færdselsarealer for alle – Håndbog i tilgængelighed’. Aqqusinerni malittarisassat najoqqutassaapput pituttuisuunatillu. Ilitsersuutit uani takuneqarsinnaallutillu aaneqarsinnaapput: http://vejregler.lovportaler.dk/ShowDoc.aspx?schultzlink=vd-anlaeg-faerdselsarealer-2013#pkt1
Dansk Standardunu nunaminertani aneerfissani tikikkuminassutsit pillugit ilitsersuusiortoqarsimavoq: ’Udearealer for alle’. Ilitsersuut najoqqutassaavoq pituttuisuunanilu. ’Udearealer for alle’ Dansk Standardimi pisiniarineqarsinnaavoq.
Inissiat tikikkuminartut 222-it pillugit SBi-mi innersuussaliortoqarsimavoq. Innersuussami inissiat nalinginnaasut, tassani Illuliornermut malittarisassat 2008-meersut (BR08) aallaavigineqarput, tikikkuminassusiat pillugit piumasaqaatini arlalinnik tunngavilersuisoqarpoq siunnersuusiortoqarlunilu. SBi-mi pisiarineqarsinnaavoq.
Tappiitsunut isigiarsuttunullu tikikkuminassutsit, TIBS
Tappiitsunut isigiarsuttunullu tikikkuminassutsit, TIBS, najoqqutassaapput.
TIBS-imi innersuussinerit tappiitsunut isigiarsuttunullu tikikkuminartunik pitsaasunik immikkut pisariaqartitsisunut tunngapput. Najoqqutassami matuma ni sanaartukkat avatangiisaat inunnit isiginiarnermikkut innarluuteqartunit tikikkuminassusiat qulakkeerneqassaaq aammalu tikikkuminassutsit pillugit piumasaqaatinut najoqqutassanullu allanut ilassutitut isigineqassallutik.