Tikikkuminartussanik pilersaarusiornerit
Suliniutip aallartinneqarnerani tikikkuminartussat pilersaarusiorneqartariaqarput nassuiarneqarlutillu aammalu nutaanik iluarsaassisoqartillugu nutaanillu sanaartortoqartillugu suliniutip suliarineqarnerani tamani ingerlaavartumik ilanngussuunneqartariaqarlutik. Suliap aallaqqaataaniilli aamma suliami tamarmi tikikkuminartut eqqarsaatigilluarneqarpata ilanngussuulluaraannilu inuit tamarmik assigiimmik atugaqarnissaat qulakkeerneqassaaq.
Tikikkuminartut sanaartortitsisumit ilanngunneqarsinnaasut ilanngutinngitsoorneqarsinnaasullu aningaasartuutaanerusariaqanngillat, pilersaarusiornernili pissusissamisoortumik ilaatinneqartariaqarput. Naggataatigummi sanaartortitsisup tikikkuminassutsinik piumasaqaatit naammassineqarnissaat akisussaaffigaa aamma tamatuma kingorna assersuutigalugu kommunimit peqqussut ilusilersuinikkut aningaasaqarnikkullu pissusissamisoortuunngitsumik kinguneqarsinnaavoq.
Tikikkuminassutsit pillugit siunnersuinerit
Tikikkuminartut pitsaasut immikkuualuttorpassuarnik iluamillu suliarisanik tunngaveqarput taamaattumillu tamakku immikkut ittumik ilisimasaqarfigineqartariaqarput. Siunnersortimik suliassaqarfimmik immikkut ilisimasalimmik attaveqarnissaq periarfissaavoq. Kukkunerit ajortunillu aaqqiinerit pinngitsoortinneqarpata, tamakku kingusinnerusukkut allanngorteqquneqartaramik, tikikkuminassutsit pillugit siunnersortimut aningaasartuutit sukkasuumik imminnut akilissapput.
Inoqarpoq sanaartornikkut ilisimasalinnik aamma tikikkuminassutsit pillugit siunnersuisinnaasunik; illussanik titartaasartut, ingeniørit, illuliortut il.il. Siunnersortit tamakku sanaartukkat killiffiinik assigiinngitsunik ilisimasaqarput aamma pisussat, pilersaarutit tikikkuminassutsillu suliarineqarnerisa qanoq misissorneqarnissaannik ilinniarsimapput. Tikikkuminassutsit pillugit siunnersortimik ikorfartorteqarnissaq pissusissamisuussaaq, ilaatigut tikikkuminartut iluamik suliarineqarnissaat qulakkeerniarlugit ilaatigullu tikikkuminartut inatsisinik naammassinninnersut qulakkeerniarlugit aamma suliniummi tikikkuminassutsit tamarmik ilanngunneqarnissaat qulakkeerniarlugit.
Atuisartunik akuliutsitsinerit
Tikikkuminassutsinik suliaqarnernik ISI-mi misilittagaqarluartoqarpoq aamma tamakku inuussutissarsiutigalugu siunnersortinut ajunngitsumik ilapittuutaapput. Ajornartorsiutit assigiinngitsut aamma ilaasortat pisariaqartitaat sinnerlugit aaqqiissutissanik ISI-mit tunniusserusuttoqarpoq. ISI inuussutissarsiutigalugu siunnersortitulli siunnersuinernut akisussaasuunngilaq.
Tikikkuminassutsit pillugit suliniutit ISI-mut nalunaarutigineqassapput
Sanaartukkanut, atortulersuutinut allanngortiterinernulluunniit nutaanut tikikkuminartut ilanngunneqarsimappata ISI najukkami qitiusumiluunniit ilisimatinneqartariaqarpoq, taamaalilluta paasissutissat ilaasortatsinnut paasissutissiissutigeqqissinnaaniassagatsigit aamma ilaasortavut taamaalillutik tikikkuminassutsit pillugit suliniutinik nutaanik nuannaaruteqarniassammata.
Assersuutinik pitsaasunik nalunaarsuinerit kingusinnerusukkut sanaartortitsisuujumaartunut siunnersortaajumaartunullu nalilimmik isummersuutaasinnaapput.