Isiginiarnermikkut innarluutillit tikikkuminassutsinik pisariaqartitsinerannik paasinninneq
Ersittumik innarluutilik, soorlu nissuminnik talerminnilluunniit amigaatilik isiginiarnermigut innarluutilimmit paasissaaneruvoq, tassami isiginiarnermigut innarluutillip innarluutaa isiniikkami ersinnanilu amerlanertigut isiginiarnermigut innarluutit ersinneq ajorput. Tassa imaappoq tappigersimaneq isigiarsunnerujussuarluunniit takuneqarsinnaanngitsut taamaattumillu paasillugit pulaffigiuminaatsuusut.
Inuk isigiarsuttorujussuaq tappiitsorluunniit innarluuteqartuartussaavoq, tassa aporfissaqalersarpoq aamma inuunissaq inuiaqatigiillu avatangiiserisat eqqarsaatigalugit periarfissaqarneq ajorpoq. Iliuutsit iluarsiissutaasinnaasut ikiorsiinerillu aporfissanik annikillisaataasinnaapput aamma inuk innarluutilik imminut killilimmik ikiorsinnaassuseqartarpoq, kisianni nammineq kissaatigisat nammineersinnaassuserlu aallaavigalugit inuussagaanni piviusunik qaangerneqarsinnaanngitsunillu killissaqartuaannassaaq.
Inuit isiginiarnermikkut innarluuteqarnerup qanoq kinguneqarsinnaaneranik ilisimasakinnerat ilisimasakinnermik, illua´tungiliilluni takorluuisinnaannginnermik aamma siumut isummiuteriigaqartoqartarnermut attuumassuteqarput – Eqqortumik oqaatigalugu tappigerneq ersigineqarpoq taamaattumillu inuppassuit isiginiarnikkut ilungersunartumik innarluuteqarneq iluamik iserfigisinnaanngilaat. Aporfissat tamakku inuiaqatigiiusutsinni isiginnilluni attaveqaqatigiikulaleraluttuinnarnitsinnut attuumassuteqarpoq. Inuit malugisaasa 80 procentii isikkut malugineqartarput aamma tappigerneq qanoq annaasaqaataatigisinnaasoq inuit amerlanersaasa takorloorsinnaasaasa avataanniippoq. Inuit isiginiarnermikkut innarluutillit nassuerutiginninniarnerat, suliassaat unammillernartut, piginnaasaqarnissamut piumasaqaatit aamma tikikkuminassutsit eqqarsaatigalugit iluarsiissutaasumik ikiorteqaatigisariaqartagaat inuppassuit paasiuminaatsittarpaat nassuerutigiuminaatsillugillu.
Piviusut
- Inuiaqatigiinni assigiinngitsunik periarfissiisunik aamma inummut peqataaffiusinnaanngitsunik inuiaqatigiinni aporfissaqarpat inuup piginnaasaasa annikillinerat innarluutinngortarput.