Kisitsisit / siammarsimassutsit
Kalaallit Nunaanni Danmarkimiluunniit inuit isiginiarnermikkut innarluutillit qassiunersut ilisimaneqanngillat imaluunniit aaqqissuussamik kisinneqarsimanngillat. FN-imi nunarsuaq tamakkerlugu peqqissutsimut suliniaqatigiiffimmi WHO-mi nunani suliffissuaqarfiusuni tappiitsut isigiarsuttulluunniit innuttaasut 1 %-erissagaat ilimagineqarpoq, tassa Kalaallit Nunaanniissimagaluarunik inuit 550-it missaanniissagaluarput. Inuit tamakku ungasissumut isigiarsuttuupput, tassa tappissusiat 6/18-iilimiilersimavoq, tassa nalinginnaasumik tappissutsip pingajorarterutaannanngorsimapput. Inuit tamakku affaat, tassa inuit 250-it sinnerlugit, ima isiginiarnermikkut innarluuteqartigaat allaat pitsaanerpaanik isarussanik kontaktlinsinilluunniit iluaquserlutik nalinginnaasumik tappissunit 1/10-ilimik appasinnerusumilluunniit isigiarsunnerupput. Isigiarsulernermi ungasissumiittunik iluamik isigisaqartoqarsinnaajunnaartarpoq imaluunniit atuarsinnaassuseq appartarpoq aamma imaluunniit sanimut isigiarsuttunngortarput, tassa isigisat annikillinerannik taaneqartartumik.
Tamakkununnga inuit amerlanersaat, tassa matumani eqqartorneqartut innuttaasut utoqqaat isigisinnaajunnaarnermik saniatigut peqqissutsimikkut ajornartorsiuteqartarput, assersuutigalugit pitsorluttut, napparissutsimik ajornartorsiutillit, tusaaniarnermikkut ajornartorsiutillit imaluunniit inussamikkut isikkamillu inuaasigut misigissusaat annikillisimasarput. Inuit tamakku pillugit imatut oqartoqarsinnaavoq; innarluutit assigiinngitsut imminnut sakkortusaataasarput ulluinnarnilu ajornartorsiutit amerlisittarlugit.