Meeraanermiit inuunermiluunniit kingusinnerusukkut isiginiarnikkut innarluuteqalerneq
Inuk tappiitsoq imaluunniit meeraanerminiilli isigiarsuttorujussuaq pisulluni angalaarnissamut aamma takussutissartaqanngitsumik attaveqaqateqarnissamut misilittagaqarluarneruvoq, uffali inuk inuunermini kingusissukkut tappigertoq tappiginnginnerminit misilittagarpassuaqarpoq, qalipaatit, periarfissat, inuit isikkui, takussutissartaqanngitsumik attaveqaqateqartarneq, avatangiisinik ataatsimoortumik takunnissinnaaneq, assersuutigalugu illoqarfiup ilusaa il.il., eqqarsaatigalugit.
Inuk inersimasutut utoqqartulluunniit tappigersimasoq tarnikkut timikkullu assorujussuaq sunnerneqartarpoq. Inuit nalinginnaasumik tappissusillit malugissutsimikkut pissarsiarisartagaasa 80 procentii isikkoortarmata tappigerneq malugissutsit sinneruttut sisamat atorlugit malugissuseq pilerseqqissallugu assorujussuaq pisariaqartinneqartussaavoq: Tusaasinnaaneq, malugisaqarsinnaaneq, naamasaqarsinnaaneq mamassutsinillu malugisaqarsinnaaneq. Inuppassuit isumaqartarput inuit isiginiarnermikkut innarluutillit malugissusii sinneruttut malussarissisartut. Tamanna oqaluuserineqarsinnaavoq, tassami malugissutsit sinneri pitsaanerujussuanngortut malugineqarneq ajorput, kisianni malugissutsit nalinginnaasumik pissusissamisoortumillu atorluarneqarnerulersarput aamma misilittakkat iluarsiisinnaassutsillu malitsigisaannik assersuutigalugit nipit tipillu annertunerusumik nassuiarneqartarput aammalu isiginiarnermigut innarluutillip malugissutsinik nalunaarsugaanullu tamakku pingaaruteqartorujussuanngortarlutik. Inuup isiginiarnermigut innarluutillip amerlanertigut inussani isiminut taarsiullugit sumiissusersiutigisarpai.
Allatut oqaatigalugu inuk isiginiarnermigut innarluutilik immikkut piginnaaneqalerneq ajorpoq, kisianni piffissap ingerlanerani paasissutissanik avatangiisiminillu arlalinnik tusarnaalersarpoq ilinniarlunilu, assersuutigalugu inuup qanoq qiimatiginera, aqqusinermi angallattut amerlassusiat, niuertarfiit qanittumiittut qanoq ittuunerat imaluunniit siallernersoq. Manissut assannik maluginiarneqartarput, tassa imaappoq manissup qaava malugissutsinik ”atuarneqartarpoq”.