Qalipaatit, qaamaneq qalipaatillu assigiinngitsorujussuit (isigisinnaassuseq)
Ininik immikkuualuttunillu paasinnittaaseq
Inuit nalinginnaasumik isiginnaassusillit inimut iseraangamik nalinginnaasumik ataatsimoortunik paasinnittarput, aatsaallu tamatuma kingorna immikkuualuttut maluginialersarlugit. Tamanna inuppassuarnut isiginiarnermikkut innarluutilinnut killormut sammivoq.
Assip oqaasertai A: Niuertarfissuaq silataanit isigalugu, asseq ersarippoq. Asseq inuup nalinginnaasumik tappissusillip isaanit isigineqarpoq.
Assip oqaasertai B: Niuertarfissuaq silataanit isigalugu, asseq ersernerluppoq. Asseq inummit isimigut quertimik (grå stær) nappaateqartumit isigineqartutut assersuutaavoq.
Immikkuualuttut paasiniarneqaqqaarput, tamatuma kingorna immikkuualuttut imminnut qanoq attuumassuteqarnersut paasineqartarput. Allatut oqaatigalugu inummut isiginiarnermigut ajornartorsiuteqanngitsumut sanilliullugu avatangiisit sivisunerusumik paasiniarneqartarput. Ersarissuseq apeqqutaatillugu ataatsimoortunik takunnittoqarsinnaavoq, tassa imaappoq qalipaatit sakkortuut qaammaqqutillu qanoq ittuunerat apeqqutaasarpoq aamma isigisatut asseq qanoq paasiuminartiginersoq. Ataqatigiissumik takunninniarluni paasissutissat amerliartortillugit paasiniaaneq sivitsoraluttuinnartarpoq aamma kukkusumik nassuiaanissaq paatsoornissarlu qalligaluttuinnartarput. Matuma qulaani assini illu filterilerlugu filterilernagulu takutinneqartut querteqarluni qanoq isikkoqarnerannik takussutissaapput. Malugiuk; assip B-ip imarisaanik paasinninnissamut piffissaq qanoq sivisutigissuamitaava?
Qalipaatit qaamanerullu utersaartitsisarnera
Assimi isigisuusisami qalipaatinik sakkortuunik paasinnittaaseq pingaaruteqartorujussuuvoq. Assigiinngissutsit tassaasinnaapput qalipaatit aamma qasertut assigiinngissusiat. Taakku isiginnaassutsimut tamarmik pingaaruteqarput. Qalipaatit assigiinngissusiisigut suut takuneqarnersut paasineqarsinnaavoq, tassami qalipaatit aamma kodeqaramik tamakkulu avatangiisitsinni atorneqartarput. Luminansimik assigiinngissutsit pingaaruteqarput, tassami tamakku itissutsimik aalanernillu paasinnittaatsitsinnut attuumassuteqarmata.
Isigisat sinaat isigisinnassutsimut aamma aalanernik takunninnermut pingaarutilerujussuarni qaamarngup utersaarneri kisimik takuneqartarput. Qalipaatit sakkortunerujartortillugit assigiinngissusiat ersarinnerujartortarput. Qalipaatit taartut qaamasullu sakkortuut assigiinngitsut aamma sunniuteqarluartarput, tassa imaappoq qalipaatit assigiinngitsunik utersaartitsisartut.
Matuma ataani titartakkami qalipaatit assigiinngitsut pingasut takutinneqarput.
Titartakkap oqaasertai: Titartakkap A-p qalipaatit utersaartitsinerat takutippaa, taannalu qasertuinnarmit pilersinneqarpoq. Akunnattumik qasertoq kipparissortooq kipparissortuup ammip qalipaataatut ittup assinganut inissitaq
Titartakkap oqaasertai: Titartakkap B-ip qalipaatit assigiinngissusiat qalipaatinik utersaartitsinertaqanngitsut takutippai. Kipparissortooq aappaluttoq taartoq kipparissortuumut aappalungusersumut inissitaq.
Titartakkap oqaasertai: Titartakkap C-p qalipaatit qalipaatillu utertitsinerat akuleriittut takutippai. Kipparissortooq tungujortoq taartoq kipparissortuumut qorsummut qaamasumut inissitaq.
Inunnut nalinginnaasumik isiginnaassuseqartunut qalipaatit assigiinngitsut immikkoortinnissaat ajornanngilaq. Isit sikorngertigajakkaanni allaaneq ajorpoq isigiarsuttuulluni. Tassani titartakkami B-mi qalipaatit assigiinngitsut takuneqarsinnaajunnaarput,uffa titartakkani A-mi C-milu assigiinngissusiat suli takuneqarsinnaasoq. Aamma titartagaq C titartakkamit A-mit ersarinnerujussuusoq takuneqarsinnaavoq. Tamatumunnga qalipaatit assigiinngissutsinik ilaneqarsimanerat pissutaavoq. Kisiannili qaamanerup utersaartitsinerani assigiinngissutsit allanngunnginnerat pingaarnersaavoq.
Titartakkap oqaasertai: Titartakkami uani qalipaatit tulleriiaat quleriiaallu takutinneqarput.
Siuleriiaani qalipaatit assigiinngitsuupput , uffa quleriiaani qalipaatit assigiimmik utersaartitsisartut.
Quleriiaani qalipaatit assigiipput, kisiannili qalipaatinik assigiimmik utersaatitsisarlutik.
Titartagaq isigiutigalugu isit sikorngertingajakkaanni quleriiaat immikkoortinneqarsinnaapput kisiannili siuleriiaat immikkoortikkuminaannerullutik. Tulleriiaani tamani sinaakkutat qanilliartortillugit qalipaatit assigiinnerujartortarput. Saamia´tungaani sinai isigigaanni qalipaatit sakkortunerorpasipput.
Tamanna qaamarngup utersaarnerata isit tappiutaanit sakkortusitinneqarnerannik pissuteqarpoq. Sunniut tamanna macb-bånd-imik taaneqartarpoq.
Inuit qulisimasumi oqilaniutinik sisorartut apeqqaamiluunniit pisuttuartut nunami ilutsit nunallu qaava immikkoortikkuminaatsittorujussuusarpaat (qaalluitsinarisarpaat). Silaqqilluni ersarissumi akerlerluinnaanik misigineqartarput, tassani ilutsit nunallu qaavi ersarinnerujussuusarput. Pisoq tamanna qaamanerup tarranitsitsisarneranik pissuteqarpoq, tamannalu qalipaatit assigiinngitsut manissunilu immikkuualuttut ersarinnerusumik takuneqarsinnaanerannut iluaqutaavoq.
Assip oqaasertai: Asseq ukiumi assilisaavoq, tassani tarrat pingaarutaat takutinneqarput. Biilit assakaasuisa aqqutaasa tarrai aputillu saamia´tungaaniittup sinaa ersarissorujussuupput. Aput tamarmik qaqortuuvoq. Tarranuku ilutsit ersarissisikkaat.
Matuma qulaani assersuutini inuit isiginiarnermikkut innarluutillit avatangiisiminnik paasinnittaasiannut qalipaatit qalipaatillu assigiinngissusiat qanoq pingaaruteqartitsiginerannik takutitsisuupput.
Illup iluani taamatut aamma pisoqartarpoq. Qulliit toqqaanngitsumik qaamanillit kisiisa atoraanni manissuni ilutsit iseriannerillu ilaatigut takuneqanngitsoortarput. Pigisat assigiinngitsut, manissumi ilutsit aamma manissumik ukkissiniarnerit immikkoortikkuminaatsunngortarput.
Tamatuma inuit isiginiarnermikkut innarluutillit ilungersunartumik eqqortarpai, ilaatigut pigisat paasiuminaallisarmata, ilaatigut pigisat immikkoortikkuminaatsinneqartarmata. Isigalugit paasissutissat ilaat ataqatigiissutsinik paasinninnissamut atorneqartussat pissarsiariuminaalligaluttuinnarput. Taamaattumik inuppassuit isiginiarnermikkut innarluutillit qaamanermik qitiutitsisumik pisariaqartitsisarput, tarrat sunniutaat sapinngisamik ersarissarniarlugit.