Nipi imerngaalanerlu (tusaasinnaassuseq)
Inuit tappiitsut isigiarsuttorujussuillu – iminnarnerit tamakkulu allanngortarnerat - sumiissusersiornissaminnut atortartorujussuuaat.
Inuit isiginiarnermikkut innarluutillit init illoqannginnersallu nipit tummartarnermik imaluunniit ajaappissamik qaqortumik atuinermik pilersitaat iluaqutigalugit suussusersisarpaat. Nipit sivisuumik imerngaalasut inuit isiginiarnermikkut innarluutillit akornutinik sumiissusersinissaannut akornutaasarput. Tappiitsut isigiarsuttullu sumiissusersiornerminni nipi atorsinnaassagunikku nipi akisualaartariaqarpoq. Tamanna pissutaalluni imerngaalanertaqarsinnaajunnaarsillugit ilusilersuisannginnissamut kaammattuutaavoq, illua´tungaatigulli inini angisuuni soorlu torsuusarsuarni, majuartarfeqarfinni il.il. nipinik nipaallisaanissaq aamma eqqarsaatigineqartariaqarluni.
Nipi tappiitsup sumiinneranut paasissutissiissutaasinnaavoq. Assersuutigalugu elevatorimit taassumallu matuanit nipit elevatorip sumiinneranik tappiitsumut paasissutissiisuupput.
Nipip qalleraattut soorlu ungataa´tungaani nipituumik nipilersornerup nipit tappiitsut isigiarsuttorujussuillu sumiissusersiutigisartagaat nipikillisittarpaat. Nipituumik nipilersornerup, assersuutigalugu niuertarfimmi, karsip nipaa nipikillisittarpaa. Nipimi karsimeersoq inuup isiginiarnermigut innarluutillip niuerniarnissaminut sumi ikiorneqarsinnaanerminut iluaqutigisarpaa.
Inuk tusaasinnaassutsini iluaqutigalugu sumiissusersiortoq assersuutigalugu lastbiilit aqqusinertigut angallattut motooriminnik sakkortuseeriataartut, qillerutit silaannatortut atorlugit aqqusinilerisut il.il. nipaannik nipitoorujussuarnik tusaasaqartarput, taamaalillutik nipit niperpassuit akornanni attuumassuteqartut, nipikillisitsineq, tusarsaajunnaartarput.
Ulluinnarni nipiliortut soorlu iikkami nalunaaquttat issarpaluttut, timmissat, puilasuliaq, niuertarfissuit matuinit silaannarsinerit aamma nipit sumiissusersiornissamut iluaqutaasut inunnut tappiitsunut iluaqutaalluartarput. Assersuutigalugu nipiliuutit aqqusinerni pisuinnaat ikaarfissaasa eqqaannut inissitat. Nipiliuutit inunnut isiginiarnermikkut innarluutilinnut pisuinnaat ikaarfissaannik sumiissusersinissamut aamma qaqugukkut isumannaatsumik aqqusinikkut ikaartoqarsinnaaneranut iluaqutaapput. Nipiliuutit iluaqutigalugit inuit tappiitsorpassuit namminiivillutik aqqusinikkut ikaarsinnaapput.
Siunissami oqaatsit immiuteriikkat qarasaasiakkoortut atorneqarnerusalernissaat eqqarsaatigineqarsinnaavoq. Atortunut assersuutigalugu bussit unittarfiini, qimuttuitsut unittarfiini imaluunniit aqqutissarsiorfiusumi nalunaarut immiussaq aallakaatittaraanni inunnut isiginiarnermikkut innarluuteqartunut attuumassuteqartorujussuussaaq iluaqutaallunilu.