Allagartarsuit allagartarsuillu sammivissiutit - Aallaqqaasiut
Allagartarsuit allagarsiiviillu sammivissiutit atortorujussuullugit paasissutissiisoqartarpoq. Allagartarsuit sammivinnut qanoq issutsinik takutitsisut pitsaasut (sumiiffiup soorlu biilinut unittarfittut, perusuersartarfittut il.il. nassuiaatitai) aamma allagarsiiviit sammivissiutit (nunap assingi, pissutsit pillugit pilersaarutit aamma ilutsit) inuit isigiarsuttut qanoq pitsaatigisumik pisunnissaannut aamma paasissutissat qanoq pissarsiarineqarsinnaanerannut aalajangiisuupput.
Titartakkap oqaasertai: Titartakkami pilersaarut paasissutissanik allagarsiivinnillu sammivissiutinik naleqquttumik inissiinernik takutitsisoq.
Allagartarsuaq tikikkuminartoq qanoq ilusilersorneqarnissaanut inissinneqarnera apeqqutaavoq, silami illulluunniit iluani aamma sumiiffiup illullu ilusaa. Aqqutissamik takutitsisoq allagartarsualersornerlu pitsaasuussappata illup sumiiffiulluunniit pilersaarusiorneqarnerani tamakku ilusilersorneqarnissaat eqqarsaatigilluartariaqarput. Illu assersuutigalugu arlalinnik allagartarsuaqarsinnaavoq (ataaseq sulisunut allalu pulaartunut), kisianni allagartarsuit assigiinngippallaat ameralavallaallu sumiiffimmiittut paatsiveerussutaassapput.
Illuni ataqatigiissaarinikkut pasinartumillu pilersaarusiorneqarsimasuni ersarissunik attaveqartuni allagartarsuit ikittuinnaasinnaapput. Allagartarsuit tamarmik assigiimmik ilusilerneqartariaqarput inissinneqarlutillu.
Allagartarsuit nassaariuminartunngorlugit suussusersiuminartunngorlugillu tamatigut inissittakkit. Inunnut isiginiarnermikkut innarluuteqartunut ajornartorsiut siulleq tassaavoq allagartarsuup sumiissusersinissaa tulliatullu allagartarsuup oqaasertaanik atuarsinnaaneq. Taamaattumik allagartarsuit attuumassuteqartunut ivertinneqartariaqarput, imaluunniit isaarissap matuata eqqaani imaluunniit torsuusap siumut sammivianut.
Titartakkat oqaasertai: Arnaq isigiarsuttoq allagartarsuup paasissutissaasiviup saavani nikorfasoq, kisianni taassuma saavani naasulerfeqarmat qanillisinnaanngilaa.
Inuit isiginiarnermikkut innarluutillit allagartarsuit aatsaat attorsinnaagunikkit atorsinnaavaat, tamakku assammik anguneqarsinnaappata (tassa imaappoq inuit allagartarsuup eqqaanut pisinnaappata). Taamaattumik pigisat – assersuutigalugit issiaviit, nerriviit naasunillu aaqqissuussat – allagartarsuit saannut inissinngisaannakkit. Aamma allagartarsuit allanut assiaqutaanani atuarneqarsinnaasunngorlugit inissinneqartassapput.