Allagartarsuit "oqaluttut"
Paasissutissat allagartarsuarniittut il.il. tappiitsunit isigiarsuttunillu tikinneqarsinnaasariaqarput/ pissarsiarineqarsinnaasariaqarput. Immikkoortup matuma siuliani allagartarsuit naqinnernik eqqortunik angissutsinillu eqqortunik atuinikkut atuarneqarsinnaasut immaqalu aamma tappiitsunut naqinnernik atuinikkut, atuaruminarnerusinnaasut nassuiaatigineqarput. Inuilli tappiitsut arlallit inussaminnik maluginnissinnaanngillat – assersuutigalugit sukkortut ilarpassui – aamma allannerit attorlugit atuarneqarsinnaasut atuarsinnaassanngilaat.
Taamaattumik allagartarsualersornerni, allatanik paasissutissiisarnerni isigalugillu nalunaarutinik atuinerni, pissusissamisooruni, nipitaliisarnissat kissaatiginartinneqarput. Tassa imaappoq oqaluttunik allagartarsualiortoqartarnissaa.
Ungasianit aqutsissuteeranguaq atorlugu imaluunniit malugissut sensor atortorluunniit allagartarsuarmiitsoq aallartinniarlugit toortakkanik atuilluni allagartarsuit ”oqalutsinneqarsinnaapput”. Taamaalillutik paasissutissat naqitat inunnut isiginiarnermikkut innarluutilinnit aamma pissarsiarineqarsinnaanngorlutik.
Allagartarsuit pisortat illuutaannik, eqqaassutissanik aamma pigisanik kulturikkut soqutiginaatilinnik paasissutissartallit naammattunik sukumiisumik nassuiaatigineq ajorput. Nipi atorlugu paasissutissat digitaliusut sukumiinerusunik paasissutissartaqartarput.