Ilioqqaaneq
Ilioqqaanermi pissutsit matumani nassuiaatigineqartut naqinnerit assigiinngitsut ilisarnaataannik allaaserinninnerupput aamma inuit isigiarsuttut tamakkuninnga atuisinnaanerat eqqarsaatigalugu tamakku qanoq ilusilersorneqarnissaannik siunnersuuteqartoqarpoq.
Naqinnerit
Naqinnerit immikkoortunut marluinnut pingaarnernut avitaapput: serifimik naqinnerit aamma sans serifimik naqinnerit. Serif titarnermut kusassaammut taaguutaavoq naqinnerup naggasiisup ataatigut titarnera aamma sans serif tassaavoq naqinneq kusassaammik titarneqanngitsoq. Serifimik naqinnerit aamma sans serifimik naqinnernut sanilliullugit tunngaviusumik titarnerit titarniinnaallu assigiinngissuteqartorujussuupput.
Titartakkap oqaasertai: ’P’ serifimik aamma sans serifimik allataavoq
Ullumikkut aamma naqinnernik aalajangersimasunik ilusilinnik sanasalersimapput, tamatumani ilutsini assigiinngitsuni marluusuni taakkunani piginnaanerit pitsaanerpaat akuliutsinniarneqarput, taamaalillutik serifimik naqinnerit atorneqaratik tunngaviusumillu titarnerit titarnerillu akorni assigiinngitsorujussuanngortiinnartarlugit.
Serifimik naqinnerit aamma sans serifimik naqinnerit tamarmik immikkut taaguuteqartiterlutik assigiinngitsorpassuarnik allattoqarsinnaavoq. Tamakku ataasiakkaat assigiinngitsunik iluseqarnertik ilisarnaatigaat. Tamatumani ilutsit pingaarnerit marluit aamma pineqarput, tassami sanimut silissutsiminnut sanilliullugit portunerujussuit atorneqarsinnaammata – tamakku ”qummut sammisunik” taasarpaat. Taamatuttaaq portussutsiminnut sanilliullutik silittorujussuusinnaapput tamatumanilu ”sanimut sammisut” pineqartarput.
Naqinnerit qanoq ittunik ilusillit pitsaanerpaanersut atuaruminarnersaanersulluunniit pillugit oqallittorpassuaqarpoq. Ilisimatusarnerpassuit takutippaat nalinginnaasumik tappissusillit ileqquliutiinnakkanut tunngatittaraat, tassami ilutsit aalajangersimasumik ilusillit atuarlugit sungiunneqartarmata.
Pissutsit allat aamma sunniuteqartut qularutissaanngilaq, kisianni naqinnerit ilusaat aalajangersimasunik isumaqarput. Ingammik isigiarsuttut allisitsiutinik atuillutik atuartartut eqqarsaatigalugit. Taamaattumik sans serifimik naqinnerit soorlu assersuutigalugit Ariel, Verdana imaluunniit Helvetica atorneqarnissaat ISI-mit siunnersuutigineqarpoq. Tamakku siunnersuutigineqarnerannut tamakku nalinginnaasumik aalajangersimasunik iluseqarnerat pissutaavoq, tamakkumi inuit amerlanerpaat atuarsinnaavaat.
Naqinnerit ersarissarneqarnerat
Naqinnerit aalajangersimasunik ilusillit ersarissutsinut assigiinngitsunut immikkoortinneqartarput: ersarissagaanngitsoq, ersarissalaagaq ersarissarluagarlu (mager, halvfed eller fed). Matumani titarnerit silissusiat qitiutinneqarput. Aallaavittut naqinnerit aalajangersimasunik ilusillit akornanni titarnertit akunnerisa silissusiat assigiinngitsuupput, nalinginnaasumilli naqinnerit alliartortinneqartillugit titarnerit soorunami silissiartortarput.
Naqinnerit ersarissarneqartarnerat assigiinngitsunik pingaartinneqartarpoq. Aallaavittut naqinnerit ersarissagaavallaanngitsut toqqarneqarnissaat aamma oqaatsit oqaaseqatigiilluunniit ilaat malunnartunngortinniarlugit ersarissarluakkanik allattoqartarnissaa ISI-mit siunnersuutigineqarpoq.
Naqinnerit angissusiat/portussusiat
Naqinnerit assigiinnik angissusillit toqqaraluaraanniluunniit imaanngilaq naqinnerit aalajangersimasunik angissusillit atorneqalersut – imaluunniit ilutsit assigiinneq ajorput.
Ilutsit angisuut ilutsinit mikinernit atuaruminarnerupput. Ilutsit angissusii ilioqqaasarnerni isiginiarnermigut innarluutilimmut atuartartumut pingaaruteqarnerpaat ilagaat.
Naqinnerit angissusiat saaffigineqartunut naleqqussarneqartussaapput.
Allakkiani saqqummersitanilu nalinginnaasuni naqinnerit angissusiat mikinerpaaffimmikkut 12-iunissaat ISI-mit siunnersuutigineqarpoq. Saqqummersitaq atuartartunut isigiarsuttunut sammititaappat naqinnerisa angissusiisa 16-iunissaat siunnersuutigineqarpoq.
Titartakkap oqaasertai: Titartakkami naqinnerit pxl-it qulaanni takissutsit, portussutsit ataanilu takissutsit takutinneqarput.
Uinganerit
Naqinnerit uinganerat nalinginnaasuusinnaapput (qummut sammisut) imaluunniit sikingasuusinnaapput. Allatani assigiinngissutsit tamakku oqaaseqatigiikkuutaat immikkoortut immikkoortinniarlugit imaluunniit oqaatsit oqaaseqatigiilluunniit ilaat ersarissarniarlugit atorneqartarput.
Misissuinerit takutippaat naqinnerit nalinginnaasut uingasunit atuaruminarnerusut. Atuartartut isiginiarnermikkut innarluutillit immikkut naqinnernik uingasunik atuarnissartik ajornartorsiutigisarpaat, taamaattumik naqinnerit uingasut atornaveersaarneqartariaqarput.
Naqinnerit angisuut
Naqinnerit angisuut oqaaseqatigiikkuutaat immikkoortut immikkoortinniarlugit imaluunniit oqaatsit oqaaseqatigiilluunniit ilaat ersarissarniarlugit atorneqartarput. Pisut ilaanni naqinnerit angisuut oqaaseqatigiinni tamani atorneqartarput. Tamanna inassutigineqanngilaq, tassami naqinnerit angisuut atuartartumut ”aporfiusarmata”, tamatumani atuarniagaq atuaruminaatsunngortarpoq. Taamaattumik oqaaseqatigiinni naqinnerit angisuut ingerlaavartumik atorneqassanngillat, akerlianik naqinnerit assigiinngitsunik ersarissakkat atorneqassapput