Radiokkut tusarnaagassiat qimaguttussaajunnaarlutik takkussimapput - taamatut neriuppugut!
Allattoq assiliisorlu: Aaqqissuisut
Ullumikkut inuit amerligaluttuinnartut oqarasuaatimikkut podcastimik naalaartaleraluttuinnarput. Tamanna radiokkut tusarnaagassiortartunut tuniluuppoq, tamakkunanimi naalaartartut amerleriapiloorsimapput. Taamaattumik Danmarkimi radiokkut tusarnaagassiat pillugit festivalit siullersaata FLYD-ip - Dansk Blindesamfundimit tapiiffigineqarluni - 2014-imi augustip ulluisa 21-anniit 24-ata tungaanut Københavnimi ingerlanneqarnissaanut tamanna naapertuuppoq.
Radiokkkut tusarnaagassiat siusinnerusukkut hørespilinik imaluunniit radioteaterinik taaneqartartut ukiorpassuarni eqqumiitsulioriaatsit ilagisimavaat tusarsaajunnaaraluttuinnartut naalaartartukilligaluttuinnartullu, kisianni inuit oqarasuaatimikkut poadcastimik naalaartaleraluttuinnarnerat ilutigalugu soqutiginnittoqarnerujartulerpoq, taamaattumillu nipit qanoq iliorneqarsinnaanersut eqqumaffigineqalersimavoq.
Radiokkkut tusarnaagassiat ukiorpassuarni tappiitsunut isigiarsuttorujussuarnullu annertoorujussuarmik aliikkusersuutaasarsimapput, taamaattumik ukiuni kingullerni siusinnerusumut sanilliullugu radiokkut tusarnaagassianik neqerooruteqartoqannginnerusarnera maqaasineqarpoq. "Tamanna tupinnaannartutut isumaqarfigaara", Tanja Andersen, isiginnaartitsinernik isiginnaagassianillu soqutigisaqartuaannersimasoq oqarpoq. "Isiginnaartitsisarfiliartarnerit nuannareqaakka, kisianni ikinngutikkalu isiginnaartitsissusianik isiginnaartilluta isiginiarnikkut innarluutilittut immikkuualuttut tamakkernagit paasisaqarfigisarpakka. Radiokkut tusarnaagassianik naalaartillunga nipit naleqqussarneqarluarsimasarput aamma nipi pingaartillugu isigisassanillu akornusersorneqarani oqaluttualiortoqartarpoq. Tamanna immikkut ittumik misiginartarpoq. Aamma aaqqissuukkuminartorujussuuvoq, angerlarsimaffimmiittoqarsinnaavormi isiginnaagassianillu tusarnaarluni.”
Danmarkimi Danmarks Radio annertunerusumik radiokkut tusarnaagassiortarpoq. Sapaatit akunnerani naalaartartut 1000-ialunnguaniit 100.000-it sinnerlugit amerlassuseqalersimapput. Bente Larsen radiokkut tusarnaagassiat pillugit festivalimik FLYD-imik pingaarutilimmik aqutsisuusimasoq imatut oqarpoq: "DR-imi radiokkut tusarnaagassianik misilittagaqartoqartorujussuuvoq, aamma manna tikillugu Danmarkimi radiokkut tusarnaagassialiorfiutuaavoq. Kisianni DR Radiodrama nuna tamakkerlugu aallakaatitsiviuvoq inuppassuarnut pisussaaffeqartoq aamma ukiuni aggersuni internettikkut isaaffikkullu allakkut radiokkut tusarnaagaasiat ikinnerusut takkuttarumaarput. Tamakkunani tusarnaagassialiat allaanerit aamma nipilerissutini periarfissani nutaamik eqqarsarnerit allatut isigineqassapput. Kisianni radiokkut tusarnaagassiuliullaqqittuni pisuusaartitsinernik tusarnaagassialiortarnernik misilittakkat amigarput. Silarsuit marluiusut nutaamik kinguneqarluartumillu naapinnissaat FLYD-imi siunertarineqarpoq, tamannalu pilerpoq.”
Aaqqissuussineq tamarmi Dansk Blindesamfundimt tapersersorneqarpoq aamma ilaatigut nipi qitiutillugu tunisassiortut kiffaanngissuseqartut unammisinneqarneranni attaveqaqatigiinnik suleqateqarsimavoq.
Tusarnaagassiat sisamat ajugaaniutivissutigineqarput. Ajugaasoq 10.000 koruuninik akissarsisinneqarpoq aammalu imaattunngorluni: ”Hvid drøm” af Keep Talking.
Uani tusarnaagissiat tamaasa naalaarsinnaavatit: www.blind.dk/flyd-2014
Isiginnaartitsissusiat nipitalerlugit
Danmarkimi tusarnaagassaliortoqartarpoq tamakkulu DR-ikkut aallakaatinneqartarput. Radiokkut tusarnaagassiaq tassaavoq isiginnaartitsissut nipitalersugaq. Isiginnaagassiaq, assersuutigalugu isiginnaagassiaq radiokkut aallakaatitassanngorlugu nipitaaluunniit tusarnaagassianngorlugu allanneqarsimasoq. Inuit arlalippassuit peqataasarput aamma tamakku nipimik erinaatigut misigissutsit pisullu paasinartunngortittarpaat. Aamma immiussat ungataaniippaluttoqartarpoq (tiitorfik natermut nakkartoq matuluunniit ammarneqarpallattoq). Isiginnaagassiaq tusarnaagassianngortinneqaraangat inuit isiginnaasut isiginiarnermikkullu innarluutillit assigiimmik atugassaqalertarput.
”Naalaarnikkut kulturi nutaaq takkutilersoq ersarippoq. Inuit oqarasuaatimikkut podcastinik naalaartarput, tamakkulu immiussissutit aamma atorsinnaapput. Tamanna nipip qanoq iliorneqarsinnaaneranik eqqumaffiginninnerulernermik kinguneqarpoq,” Bente Larsen festivalimik FLYD-imik aaqqissuussisuusoq oqarpoq.
DR-imi Radiodrama-mi tusarnaagassialiat nangeqattaartuunerupput nal. ak. 30-nik sivisussuseqartut. Sapaatit akunneri tamaasa Danmarks Radiokkut tusarnaagassiat nangeqattaartut nuannarineqarluartut aallakaatinneqartarput.
Pingasunngornikkut nal. 11.30 aamma 00.30 aamma sisamanngornikkut nal. 21.03 DR P1 FM-imi DR-imi Radiokkut tusarnaagassiat naalaarsinnaavatit.
Radiokkut tusarnaagassiat tamarmik DR-ip nittartagaani podcastitut aamma aaneqarsinnaapput:
http://www.dr.dk/p1/radiodrama